論工作場上的朋友與敵人

俗語講得好，呢個世界無永遠的朋友，亦無永遠的敵人，最近發生左件事令我深深感受到......

本身我做女裝鞋外貿，客人有部分訂單係需要自己驗貨的，有個比較後生的美國人負責，剛開始配合的時候就都幾麻煩既，好處係唔貪心，但係做事都比較死板。後尾配合左一排大家都比較了解大家既工作方式，就都合作得幾開心。

最近他又突然間吹毛求疵，基本上係用放大鏡睇野，亦馬上過年，工作量增大，令到我都幾頭痛，唯有自己內部都盡量去協調，再做好d。

原因究竟係咩？其實好簡單，工作基本上就兩個原則

• 各為其主
• 人不為己天誅地滅

最近客人公司那邊有人事變異，他崗位差不多但職級比他高的一位同事離左職，同時他公司那邊也批了budget給他多請一個人，令到他有升職的想法，作為他的立場他想升職他就要挑到我作為貿易公司的毛病，他才有辦法表現自己，步步高升。

我相信係他升職以後，他的工作方式會回到正常，也不會過分雞蛋裡挑骨頭。畢竟，貨物係製造途中就發現並解決問題才是最好的。我個人來講亦好希望他可以完成了他的目標，升職加薪，因為一路以來大家配合都唔錯，但係當然啦，最好墊屍底個個唔係我啦。

呢個係一個好簡單同一個人由敵人>朋友>敵人>將來變翻朋友的實例，其實大部分人做事就都有背後目的，好少係純想害人而害人，所以如果有係工作上令你不愉快既人，或許可以停底諗下，無乜必要凡事去得太盡。

生意2

近排好多人揾我做生意，想我夾一份又幫手睇下數，其中一個就想揾我開間廠，對話內容如下：

C：不如一齊開間廠吖，我有個朋友本身同我夾兩份既，如果你玩咪夾多份咯，本身我拍檔做開有信心一年回本。

S：先唔懷疑你一年回唔回到本，我就當無問題，大家大方向，生意點走，你同人傾左未先？

C：甘都做左七八年生意，都信得過既。

S：唔係信唔信得過問題，一年回本，賬面回本同資金回本係兩回事。就當賺錢，對你來講系副業，你肯定多少都想分現金。但係對你搭檔來講是主業，生意越做得多賬面越賺錢，擴充規模，增加進貨量，全部都要現金，大家無論賺蝕係呢d大方向，比經營細節都要更先傾好，先有得一齊做生意。

本身我呢位朋友都叫做d實業賺到d小錢，但係我知道他並無同人夾份做過生意，就特別提醒到他不同股東，對同一個生意的不同大小看法，不論賺蝕都會導致生意做不成，朋友無得做，所以在我建議他從新跟他的未來搭檔聯姻前，都係事無大小都再仔細討論下先比較好。

夾錢做生意真係一個需要非常謹慎同非常透明去討論大小細節既事，希望大家多加注意！

STAR WARS JEDI CHALLENGES

今日同阿女去沙田行下街，跟住見到有個檔口係度賣緊GAME，係STAR WARS JEDI CHALLENGES。

本身我就唔係星戰迷黎既，見到盒野買2299，都有d猶豫，萬一又好似其他AR game 甘搞d gimmick 跟住完全唔好玩甘點算呢，稍稍睇左下review，居然幾乎全部都係正面既，甘其實本身對AR/VR都好有興趣，就買左翻屋企試下。

寫呢篇野時剛剛玩左半個鐘左右，講真真係不得了，我相信大部分男仔不論係唔係星戰迷，都曾經試過拿住支劍類既野係甘隊，而呢個遊戲比到十足投入感你！聽講越玩往後，你就係一個更成功既JEDI，除左用劍亂隊，可以用THE FORCE 彈走人，當然用劍彈子彈呢d操作都是必備的。

如果有d閒錢，屋企地方夠（都起碼需要個3mX3m 既空間可能先玩得比較舒暢），對新科技有興趣，細過有拿過劍類既野隊過，建議大家都可以買來玩下，確實唔錯！

另外我想講下我玩左半個鐘停係因為電話有d過熱遊戲有點卡了，我本身用緊iPhone X,可能都係用iPhone 8 plus/iPhone 8 既兄弟會打得比較暢快。

經過書局買左本80後百萬富翁~讀後感

拜讀左龔成老師本80後百萬富翁，睇完覺得年輕人睇係幾好的，從對工作/投資心理準備，心理態度，如何工作，如何自我增值，點樣睇錢，財富，等等都有講到，亦到簡單講到下點樣可以致富（一般人會講發達），當然每個人對發達既概念都唔一樣，但係基本心態呢d我個人認為系年輕人好應該拜讀學習的。

特別想講既係，書入面提到其中兩個題材就是OPM（其他人的錢）同五種致富方式，做生意，做專家，投資，仲有其他暫時唔提了。

現在這個社會好多投資blogger 講到槓桿，都係主要講系低息，值得投資的時候，借取低利息資本，賺取高回報，而到系市況比較好的時候，就去槓桿，鎖定利潤，真正做到資產增值。

更進一步的方式卻比較少人講，就係OPM+做生意/專家的複合效應，呢個複合效應係可以達至0利息而極速賺到第一桶金。

隨便講幾個例子:
以前的股票經紀，他賺取的資金係以客戶的投資額去計算，而不用以自己的資金去賺取投資回報，他賺取的金額的本金數額可以比他擁有的大百倍甚至千倍。

UBER/GOGOVAN之類的平台，他們不需要擁有車，擁有司機，但是建立了平台，他的平台在最開始的時候是不需要實際資產的，但係可以從比初始投資額要巨大的總投資額去得到回報（全部加入他們平台的車與司機的價值）。

現在支付寶的餘額寶/其他基金也是一個道理，他們雖然是拿了顧客的錢去投資，然後分配回報給顧客，而大部分還並不是保本的，就是賺就一齊賺，虧就顧客虧。

以上例子其實都係典型的OPM+專家複合效應達到免費使用比本身資本更大的資金而達到極速致富，好多行業既人都可以做到呢個效果，當然規模越大，賺到的錢就越多。我個人來講都係希望年輕人，真正明白到，投資在自己工作上的時間，學到既野，其實不會浪費的，只是看你是否真正學習到，成為行業的專家，定係你只系普通地工作。

最後如果有機會同龔成老師講句野，我會想問下，好多人睇他的書上他的堂，其實睇完都唔明，最後都係為左一個“冧巴降”，那他用那麼多時間去分享，去教導，是會有咩感受😝😝

日常3 - 同老婆食餐生日饭

上個禮拜同老婆過福村日本料理食生日飯，2017 到目前都幾順，就自己兩個人食，傾下d無聊野，幾開心。

呢間野service 真係幾好，本身就唔包甜品既，甘我食omakase 問可不可以準備埋個蛋糕仔都搞埋，幫我地影相個同事仲非常nice，影得好好。

遲d阿女大少少唔在尖叫都想一家大細再來過，亦希望年年老婆生日時都覺得當年比較順利啦。😋😋😊😊😊😊

BB 女第一次病

阿女第一次發燒（9個半月大），老婆打電話問法國醫院，醫院就話仁安醫院夜晚有急診專科比較好，就過左仁安睇。前後入左兩次，第一次過去就話觀察兩日，開左d退燒藥，一係感冒，一係玫瑰疹。翻屋企過左兩日都係無退燒，第二次過去醫生就建議入院觀察。

BB頭尾係醫院住左兩晚，第一晚仲有少少燒，第二日中午開始就無燒，下午就出疹了，跟住隔多日就出院。頭尾兩晚，半私家房收費一萬二左右（全部雜費藥費包曬）。本身有幫小朋友買保險，睇過下基本上都可以全claim。雖然唔係好大問題，但係醫院大人真係舒服d，有張貼紙可以自動mon住小朋友體溫，唔洗大人好緊張成日用探熱隊BB耳仔。小朋友都無甘容易發脾氣。

前後有三位醫生睇過阿女，特別多謝翻第一晚（得第一晚係醫生睇緊我在場）急診的李家興醫生，檢查小朋友好快手，好熟手，以後有咩應該都係去翻仁安。 👍

好耐無寫blog...

同朋友夾份做左間私房菜，就係地獄既開始，無管理，無制度，無數據，就做幾圍生意都一塌糊塗，搞到最後要自己接手做翻，仲慘過從頭開始。

其實投錢初期都預左唔係特別賺錢既project，只係為朋友聚腳多個地方，但係實際經營既慘況簡直非筆墨所能形容......

好的地方去諗就又多個經營經驗，而家大概理解做飲食管理庫存方式，廚房管理，至於其他野就其實所有企業都大同小異。

另外夾錢做生意以後真係要謹慎d，呢個世界比較多講得唔做得既人-_-

麵粉與麵包

週不時都仲聽到有人講麵包肯定貴過麵粉既問題，我估計講呢句野既人同宣揚呢句野既人如果唔係另有目的就係無參與過管成本既管理職位/無做過生意。

麵包一定貴過麵粉只係一般美好假設情況下每個麵包店都賺錢既情況。然而現實係租金可能會加，味道做唔好可能賣唔起價，過期唔賣會血本無歸需要減價賣，好多情況都有可能令一個麵包店虧本經營即係，麵包仲平過麵粉+其他成本的情況。

如果出現什麼情況各大地產商覺得要錢好過要盤，其實樓價係有可能會跌的，也有可能讓他們以成本價什或是虧本去賣。

當然眾所周知香港地產商基本上都實力雄厚，係咪會去到甘既一日機率什底。不過真係再聽見麵包（產品）一定貴過麵粉（成本），我只能夠講呢個世界太多人存心誤導，以偏概全。

日常2

昨晚比較晚的時間看到一篇漫畫，設定係一個學院都市，學校裡面唯一指標就是賺錢，夠年齡賺夠錢就可以升學級，睇左幾十話我大概認為他的背景設定如下。

1. 所謂學院都市（國家）本身資源係無限的，因為貌似你只要得到該國貨幣，豪車豪宅該買到的野都係買到的。
2. 一如其他漫畫，該學院都市系獨一無二的，所以無其他地方會有競爭，任何競爭良性也好惡性也罷都係學校裡面的同業/投資者之間的競爭
3. 無所謂賭博行為存在，貌似暫時所謂槓桿投資的情況也比較少（起碼唔係漫畫入面提及到）
4. 所有學生入學時資產都基本歸零，只獲派依照入學考試成績的基本生活費，要馬上揾工先可以生活到
5. 漫畫入面有好多大資產家系入學期間就累積左一般學生不可能賺到的資產，但係該漫畫作者無提及遺產的存在，如果作為資產家畢業了，手底下營運既公司同學院的錢可以承繼嗎？定係學校會回收並無提及到。
6. 主角系信奉資本主義，覺得有才華，有努力，中意賺錢，就應該賺到錢，希望以呢種方式去鼓勵學生於該學院就讀
7. 反派就利用極端社會主義，以資本主義制度會令到貧富懸殊嚴重化去攻擊主角一派，提倡每月有無條件基礎收入去同主角一派競爭

基本上睇到呢度其實結局系點都唔難猜測（我未睇到），估計都係主角一派完胜無誤，但係該名作者用咩理據去支持，我有時間都會想睇埋。

甘到底有無一個社會制度係可以每個人都好滿足？我相信系唔存在，因為世上無一個地方/國家同漫畫入面第一個假設是一樣的，國家本身有無限資源。

另外我個人覺得其實真正想發達，作為超級富人的人還是極端的少的。大部分係呢個世界作為富一代既人，初期經營都係想揾兩餐/發揮自己興趣所長，絕少人係以我要賺錢賺錢發達發達作為原始推動力。我比較常見到的，都係所謂安居樂業，衣食住行滿足到，生活安穩有某部分閒錢去支持自己興趣就可以了。

當然我所講既安居樂業，也不是一個絕對值，會隨著社會經濟發展有不同的要求，比較簡單的例子是80年代的基礎需求跟2017年的基礎需求，不用做問卷調查大家都可以知道有巨大的差別了。

拿幾個重點去講就是。 。 。
1. 一個地方的基礎資源越多，就越容易安居樂業。
2. 一個地方如果人口減少，就自然會安居樂業，但係自然就會少經濟增長。
3. 其實安居樂業，同適宜拼搏的地方是不一樣的，以美國中國為例，美國有拼搏心的人都去東岸（紐約）做事，比較休閒的就在各自家鄉/西岸做事，中國比較有拼搏心的人就去北上廣深，比較休閒的就還是在各自家鄉/二級城市打工。而中國同美國的人出城市做事後，大部分人的想法都是回到家鄉（土地成本便宜）退休。

寫到呢度已經覺得太複雜，剩下有心整理下再寫

投資1

平時無野做都好喜歡睇下Yahoo News 金融個欄同其他Blogger/寫開書既投資專家既facebook之類，貪好多人會留言，問問題，好多時有d野自己想問就唔洗問都可以了解到，或者世上股票甘多選擇，可能人地睇到某d野忽然令我有興趣可以花多d時間去開拓。

有個比較普遍既說法就係要平衡自己個portfolio。有唔同風險類別既野，我相信好多人都成日聽架啦，但係當我觀察呢堆有心學習既留言者，我發現好多時候好多人都忽略左一個重點，投資係自己既工作同career上面。

經常都會見到，Yahoo news金融入面有d投資專家，收到讀者去信問，30-45歲之間，家庭收入五萬七萬，有資產，然後想問幾時退休，有某d投資目標，睇下點樣做比較好。然後留言度見到，一般唔係討論個建議合唔合理，而係話收入高去信問肯定無可能，而係該名投資專家自編自導叫人買基金既廣告。

另一個情況，好多收入10000出頭既年輕人，不斷報讀課程，買書，花大量既時間去睇不同的投資專欄，研究大量既投資技巧，學習分析各種唔同報表，希望揾到所謂十倍股百倍股令自己致富達到現今香港人好流行講既財務自由。

當然呢兩個情況都係極端例子，但係兩個極端中間既人會忽略左對自己個人既投資，應該係比較普遍既現象。

其實用個比較簡單既例子，月入一萬到月入一萬五，中間呢一年六萬蚊，只要係年輕勤快，做有前景既工作或馬上有高回報既工作（我唔反對年輕時做多付出勞力去得到高薪資，因為年輕人既遠期投資回報都比中年時用同樣數額高，條條大路通羅馬），好多人都可以做到。但係以投資回報一年賺到六萬（而唔係短期炒賣），用年回報8%，在無槓桿的情況下，需要750000資本。

講到呢度我相信應該好容易明白了，自己既Career其實都係portfolio既一部分，除左用資產/儲蓄去投資，花時間係自己身上都係一個有機會有高增長高回報既項目，年輕係好重要既資本。好多人唔明白點解會有人高收入，有資產，仲會去問所謂投資專家。換個角度其實好合理，他們的個人增長已經去到一個比較難有爆發性增長既位置，所以他們會去尋求另一方面的增長看看可否維持甚至得到更大回報。

希望大家係聽見專家講平衡自己個portfolio既時候，停一停，諗一諗。到底投資，概括時間/金錢之類所有需要投入而得到回報既項目，係咪真係只有意識入面成日聽到既股票基金Reits Bonds 之類，定係有d更重要既野係好多人都忽略左。

日常1

大概一年前生意開始比較穩定之後，有個每日睇新聞睇專欄既習慣。今天某位專欄作家就話狀元全部考醫生因為香港既成本高，國外反而有鼓勵創業，支持優先聘請有創業經驗既年輕人之類的。

其實真係有去過國外就知道，國外創業成本並唔係好高，租金，甚至競爭，比起香港，確實係低好多，但係呢種情況只涵蓋不屬於大城市既國外地方。假如係同香港有對比性既紐約，東京，倫敦，其實創業成本一樣高，失敗壓力一樣大。

想要獲得好既機會，賺到第一桶金，其實流動性一樣重要，呢個世界仲有好多國家/地區。係發展中而租金/競爭/人工，都處於一個相對容易成功既環境，我發現好多報賬專欄都故意忽略左流動性這個重點。

講個好簡單既例子，香港人經常好羨慕的台灣人，老牌工業比較成功的，早年就由台灣到中國，中國到東南亞，為既就係用低廉的成本，較低的競爭，去獲取更大的利潤。其實國內係咪最好生活既地方，肯定唔係，不過有心想向上爬揾錢，還是比完全發展的大城市機會要多好多。

其實機會始終係自己揾既，流動性只係很多可以改變的客觀條件入面其中之一，如果唔願意自己主動去改變客觀條件只希望旁邊環境會為你而改變，好難可以系社會向上爬。

生意1

今日下午有個會議要開，關於前年過年投資既兩間酒吧。其實呢兩間酒吧到而家投資左一年半，雖然已經算系地區性行業龍頭，但係其實都仲未回本。話說其實做酒吧生意都係一個比較強烈體驗到你睇人好，人睇你好既心態。好多人去酒吧覺得超市買支酒三百幾去到酒吧賣千零蚊好好賺，其實裝修，人工，整體氣氛，樣樣都係錢。

香港地人工貴租金高基本上都無辦法做到呢種所謂大酒吧，所以基本上全部絕跡。

中國人比較多而且也流行這種娛樂方式，而且租金比較貴，長期應該可以當一般生意做（沒有暴利）。實際挑戰也會同飲食業類似，飲食業基本上挑戰係經常到來，因為開新餐飲既人日日都有，要不斷保持並且偶有新意進步先可以同市場接軌。

大型酒吧雖然投資額很輕鬆就要上千萬，但係因為行業比人既感覺，不斷有土豪抱著唔賺錢都無所謂既心態去開始，據甘多年觀察，真係一雞死，一雞鳴，所以都係一樣要不斷有新意定期從新投資裝修先有辦法保持到行業競爭力。

希望下年年底可以回本，回本，回本！ （不過我估比較困難，都係可能寄望長遠的品牌價值可以比我更大回報比較實際）

背景故事 生意與客戶關係的小分享

今日系我考慮左好耐然後下定決心去開始寫一個blog。就blog既主題其實我用幾分鐘時間就決定左。主要會圍繞我本身做緊既生意，我想開始做既投資（出黎做野十年無好似大部分香港人甘週時揾野炒，初心者），同我日常生活做事中碰到既事。

除左揾個地方記錄低學過睇過見過既野之外，都想可以分享下生活同工作上既經驗，睇睇會唔會可以開拓到個方式認識到志同道合既新朋友。

好明顯我對寫blog既相關功能都未能完全了解，反正慢慢試下，持續完善啦。

第一篇文章我都係講翻生意先。話說今日一起身就有位同事發信息通知我，個客個邊取消左10000對鞋既訂單。甘其實我做鞋呢行就都十年架啦，但係今年我對待客人發任何消息過黎，比較可以平靜同用個正面既態度去面對，同以往甘多年都有明顯既分別，我反思完之後總結左幾個重點，可以培養正面態度去面對客人

1.要面對既係客人，唔係競爭對手。
2.要做好自己，唔係做死其他同行
3.要同客人培養到長期而穩定既關係

其實無論做任何生意，面對既係街客/其他公司，一次買賣入面講既都係VALUE，你提供既產品對得上你收既錢，自然會有長遠而穩定既生意。所有競爭對手其實都係你既學習對象，因為一門生意如果存在到一定時間，絕對會有他可以生存既方法，而其實係好應該去學習的。做生意最忌惡性價格競爭，明明無錢賺都夾硬做，最後只會損人不利己。

有d人可能會覺得，我提供既產品，以XX角度來講絕對系超值，但係點解生意都仲係好差，做唔落去，唔賺錢。

其實道理好簡單，翻番去第一句講既，XX=/=客人，所以無生意做。
可能有其他人已經可以系同樣類別提供相同VALUE既野，可能係你提供既產品無即時需求（唔排除好既產品可以吸引都客人，但係實際操作都要經常反思產品到底有無客人需要） ，簡單講就係，產品同客戶唔過電。

無論係做生意，定係做sales(聽講而家好多唔同行業既sales都係自僱人士)，都可以先停低想想，自己賣既野到底有無人需要，無既話可能就要靠很高超的銷售技巧了。

題外話

本來系想寫產品系需要同客戶接軌既，但係思維成日跳躍算系我一個壞習慣。寫到最後我記得The Wolf of Wall Street 一句說話，How do you sell this pen? 電影入面將既有產品附加價值令客戶有需求，同我所講針對客戶需求去銷售及製造產品，其實講到尾，都係以客為本。

The Wolf of Wall Street 都算系一套同我客戶頗有淵源既電影，希望後面可以堅持寫blog再分享下相關既故事。